ស្វាយរៀង៖ ក្រុមក្មេងទំនើងអាយុ ១៥ឆ្នាំ ចំនួន ៦នាក់ ប្រដាប់ដោយដាវនិងកាំបិត ត្រូវបានប៉ូលីសចាប់ខ្លួននៅថ្ងៃទី២៥ ខែធ្នូ ឆ្នាំ២០២៤ បន្ទាប់ពីប្រជាពលរដ្ឋរាយការណ៍ពីសកម្មភាពកាចសាហាវរបស់ពួកគេ។ ក្រុមក្មេងទំនើងនេះត្រូវបានគេប្រទះឃើញជិះម៉ូតូ ៣គ្រឿង តាមដងផ្លូវក្នុងស្រុកស្វាយជ្រំ ដោយអូសដាវលើថ្នល់ជាច្រើនគីឡូម៉ែត្រ មុនពេលចុងក្រោយត្រូវបានចាប់ខ្លួននៅកញ្ចុះលក់ដូរដងព្រែក ស្ថិតនៅភូមិដូនស ឃុំដូនស ស្រុកស្វាយជ្រំ ខេត្តស្វាយរៀង។
នៅម៉ោងប្រមាណ៣និង៣០នាទីរសៀល នគរបាលប៉ុស្តិ៍ពោធិរាជ បានទទួលទូរស័ព្ទបន្ទាន់ពីប្រជាពលរដ្ឋទាក់ទិននឹងសកម្មភាពក្មេងទំនើងខាងលើ។ អាជ្ញាធរមូលដ្ឋានបានចល័តកម្លាំងសហការឆ្លើយតបភ្លាមៗ ដោយមានការចូលរួមពីប៉ុស្តិ៍នគរបាលជាច្រើនរួមមាន ពោធិ៍រាជ ធ្លក អង្គតាសូ និងដូនស ដើម្បីស្ទាក់ចាប់ជនសង្ស័យ។
ក្រោយឃាត់ខ្លួននៅចំណុចកញ្ចុះលក់ដូរដងព្រែក ភូមិដូនស ជនសង្ស័យត្រូវបានបញ្ជូនទៅកាន់អធិការដ្ឋាននគរបាលស្រុកស្វាយជ្រំ ដើម្បីធ្វើការសាកសួរ ។ ក្នុងការសួរចម្លើយ ក្រុមក្មេងទំនើងបានសារភាពថា នៅមុនថ្ងៃនោះ វេលាម៉ោង១រសៀល ពួកគេបានរៀបចំផែនការ និងធ្វើសកម្មភាពជិះម៉ូតូប្រដាប់ដោយ ដាវនិងកាំបិតតាមផ្លូវអូសតាមបណ្តោយថ្នល់បានចម្ងាយប្រហែល ១៥០០ ម៉ែត្រ ក៏ឈប់អូស រួចជិះម៉ូតូទៅដល់ភូមិអញ្ចាញ ឃុំពោធិរាជ ស្រុកស្វាយជ្រំ ក្រុមបក្សពួកខ្លួនក៏កាន់ដាវនិងកាំបិត អូសលើថ្នល់ម្តងទៀតបានចម្ងាយប្រហែល ៥០០ម៉ែត្រ ទើបឈប់បាននាំគ្នាជិះម៉ូតូចូលផ្ទះបន្ទាប់មកក៏យកដាវនិងកាំបិតដាក់ក្នុងកែបម៉ូតូ។
ខណៈកំពុងដើរលេងនៅកញ្ចុះលក់ដូរដងព្រែកស្ថិតនៅភូមិដូនស ឃុំដូនស ស្រុកស្វាយជ្រុំ ស្រាប់តែក្រុមនេះត្រូវ ប្រឈមមុខដាក់ប៉ូលីស ហើយបានឃាត់ខ្លួន រួមទាំងដកហូតបានកាំបិតនិងដាវនៅក្នុងកែបម៉ូតូរបស់ពួកគេ។
ក្រោយចម្លើយសារភាពរបស់ក្មេងទំនើងខាងលើនេះ នគរបាលស្រុកស្វាយជ្រំបានរាយការណ៍ពីការចាប់ខ្លួនទៅកាន់ស្នងការនគរបាលខេត្តស្វាយរៀង និងបានពិភាក្សាជាមួយលោក ខាំ សុផារី ព្រះរាជអាជ្ញាអមសាលាដំបូងខេត្តស្វាយរៀង ដើម្បីចាប់ផ្តើមចាត់និតិវិធីច្បាប់ចំពោះក្មេងទំនើងទាំងនេះ៕
